БАЙГАЛИЙН ЧАНАД ДАХЬ ХЯЗГААР. Өнгөрсөн 2025 онд ОХУ-ын Забайкальском хязгаарыг зорих жуулчдын цуваа эрс нэмэгдэж, аялал жуулчлалын салбарт томоохон ахиц гарлаа. Тус бүс нутгийн Эдийн засгийн хөгжлийн яамны хэвлэлийн албанаас мэдээлснээр, жилийн хугацаанд аялагчдын тоо 75 мянгаар өсөж, нийт 532 мянган хүнд хүрчээ.
Жуулчдын урсгал ийнхүү тэлсэнтэй холбоотойгоор зочлох үйлчилгээний салбарын багтаамж ч мөн өргөжсөн байна. Өнгөрсөн нэг жилийн дотор тус хязгаарын зочид буудал, амралтын газруудын номерны фонд (орны тоо) бараг 10 хувиар нэмэгдэж, 5.7 мянган нэгжид хүрчээ.
Дэд бүтцэд 797 сая рублийн хөрөнгө оруулалт хийжээ.
Забайкальском хязгаарын Эдийн засгийн хөгжлийн сайд Жаргалма Бадмажапова тус бүс нутгийн Прокурорын дэргэдэх салбар дундын зөвлөгөөнд оролцох үеэрээ аялал жуулчлалын салбарын санхүүжилтийн талаар дэлгэрэнгүй мэдээлэл өглөө. Түүний тэмдэглэснээр, тус бүс нутгийн эдийн засагт аялал жуулчлалын үзүүлэх нөлөө жилээс жилд жин дарж байна.
«Бүс нутгийн Засгийн газар болон манай яамнаас аялал жуулчлалын салбарыг системтэйгээр дэмжиж ирлээ. 2022 оноос өнөөдрийг хүртэлх хугацаанд энэ салбарт нийт 797 сая рублийн санхүүжилт гаргасны дийлэнх хувийг холбооны төсвөөс татан төвлөрүүлж чадсан» хэмээн Жаргалма Бадмажапова онцлов.
Тус хөрөнгө оруулалтыг дараах үндсэн чиглэлүүдэд зарцуулсан байна. Үүнд:
- Аяллын жим, явган замын төслүүдэд: 253 сая рубль,
- Кемпинг болон модуль хэлбэрийн байр сууцуудад: 154 сая рубль,
- Санитар, эрүүл ахуйн бүс болон уурын зуухны шийдэлд: 70 сая рубль.
Аюулгүй байдлыг нэгдүгээрт тавина
Сайд Жаргалма Бадмажапова илтгэлдээ масс аялал жуулчлалыг зохион байгуулалттай хөгжүүлэх асуудлыг хөндөхийн зэрэгцээ аялагчдын аюулгүй байдал, тэр дундаа усан сан, гол мөрний орчимд иргэдийн амь насыг хамгаалах хууль тогтоомжийн хэрэгжилтэд онцгой анхаарч байгааг дурдлаа.
Уг салбар дундын зөвлөгөөнд ОХУ-ын Онцгой байдлын яам (МЧС), Роспотребнадзор болон орон нутгийн өөрөө удирдах байгууллагуудын төлөөлөгчид оролцож, зуны аялал жуулчлалын оргил ачааллын үеэр урьдчилан сэргийлэх ажлыг эрчимжүүлэхээр тохиролцсон байна.
.png)
