05:44
20.11.2026
Баасан
Вьетнам, Оросын эрчим хүчний салбарын хамтын ажиллагааг өргөжүүлэхээр тохиролцжээ
19.11.26 20:20

Вьетнам, ОХУ-ын удирдагчид Шэньжэнь хотод болж буй Ази, Номхон далайн эдийн засгийн хамтын ажиллагааны (АПЕК) дээд хэмжээний уулзалтын үеэр хоёр орны эрчим хүчний салбарын хамтын ажиллагааг гүнзгийрүүлэхээр тохиролцсон тухай Вьетнамын Засгийн газар мэдээлжээ.

Лхагва гарагт болсон уулзалтын үеэр ОХУ-ын Ерөнхийлөгч Владимир Путин Вьетнамын Ерөнхийлөгч То Ламд хандан, Москва эрчим хүчний салбарыг хөгжүүлэх туршлага, технологио хуваалцаж, боловсон хүчин бэлтгэхэд нь туслахад бэлэн байгаагаа илэрхийлсэн байна.

Хоёр улсын удирдагчид мөн газрын тос, байгалийн хийн салбарын хамтын ажиллагааг өргөжүүлэх талаар хэлэлцсэн байна. Оросын компаниуд хэдэн арван жилийн турш Вьетнамд хамтарсан компани байгуулж, далайн эргийн бүсэд газрын тос, байгалийн хий олборлох төсөл хэрэгжүүлж иржээ. Мөн сэргээгдэх эрчим хүч болон цөмийн эрчим хүчний салбарт хамтран ажиллах шинэ чиглэлүүдийг хөгжүүлэхээр тохиролцсон байна.

Вьетнамын эрх баригчид цахилгаан эрчим хүчний өсөн нэмэгдэж буй хэрэгцээгээ хангах зорилгоор энхийн зориулалттай цөмийн эрчим хүчний хөтөлбөрөө дахин хэрэгжүүлэхээр төлөвлөж байгаа юм. Үүнээс гадна, хоёр улсын удирдагчид эдийн засаг, худалдаа, хөрөнгө оруулалтын салбарын харилцааг бэхжүүлэхэд бэлэн гэдгээ илэрхийлжээ.

АПЕК-ийн дээд хэмжээний уулзалт болж буй энэ долоо хоногт ОХУ сүүлийн арав гаруй жилийн хугацаанд Зүүн Азийн бүс нутагт байгаагүй өргөн хүрээнд цэргийн нисэх онгоцнуудаа байршууллаа. Уг ажиллагааны хүрээнд холын нислэгийн үеэр агаарт шатахуун цэнэглэгч онгоцнуудаар дагалдуулсан стратегийн бөмбөгдөгч онгоцнууд Вьетнамын Дананг нисэх онгоцны буудалд газардсан байна.

Эх сурвалж: Reuters

Мэдээг хуваалцах:
Мэдээг хуваалцах:
© 2023, «Дорнын цаг». Бүх эрх хуулиар хамгаалагдсан.