ОХУ-ын Ерөнхийлөгч Владимир Владимирович Путин зургаадугаар сарын 14-ний өдөр АНУ-ын Ерөнхийлөгч Дональд Трамптай утсаар ярьж, түүний 80 насны ойн баярын мэнд хүргэжээ. Хоёр улсын удирдагчдын яриа найрсаг, нээлттэй уур амьсгалд өрнөж, орчим цаг буюу яг 55 минут үргэлжилсэн байна. Энэ талаарх ОХУ-ын Ерөнхийлөгчийн туслах Юрий Ушаковын тайлбарыг Кремлийн албан ёсны цахим хуудсанд нийтэлжээ.

“Та бүхний ойлгож байгаачлан, зөвхөн баярын мэндчилгээ солилцоод өнгөрөөгүй. Ерөнхийлөгч Д.Трамп зөвхөн дулаан үгс, сайн сайхны ерөөл сонсоод зогсохгүй, удирдагчид олон улсын өнөөгийн нөхцөл байдлын гол сэдвүүд, Орос-Америкийн хоёр талын харилцааны хөгжил болон хоёр талын төлөөлөгчдийн боломжит харилцаа холбооны асуудлуудыг хэлэлцсэн” гэж Ушаков тэмдэглэв.

Түүний хэлснээр, баярын мэндчилгээний хувьд албан бус хэлбэрээр өрнөсөн бөгөөд хоёр удирдагчийн хувийн харилцааны онцлогийг харуулсан байна. ОХУ-ын Ерөнхийлөгч Дональд Трампын тэмцэгч чанар, цохилтыг даах чадвар, саад бэрхшээлийг амжилттай даван туулж, зорилгодоо тууштай хүрэх чадварыг хүндэтгэдэг гэдгээ нуугаагүй гэнэ.

“Дашрамд хэлэхэд, манай Ерөнхийлөгч баярын цахилгаан цаг утас илгээсэн бөгөөд үүндээ ойн эзний хувь хүн болон улс төрчийн хувьд амжилтад хүрэхэд нь нөлөөлсөн ер бусын зан чанаруудыг нь онцолсон байна. Дональд Трамп хэлсэн үгэнд сэтгэл нь хөдөлж, талархал илэрхийлэхдээ, Цагаан ордонд түүн рүү хамгийн түрүүнд утсаар ярьж баяр хүргэсэн гадаадын удирдагч нь Владимир Путин байсныг тэмдэглэсэн” гэж Ерөнхийлөгчийн туслах тодотголоо.

Мөн тэдний харилцаа албан бус, хошигнолоор дүүрэн байсныг Ушаков онцолсон юм.

“Нэг нууц задлахад, Дональд Трамп эрч хүчээр дүүрэн байгаа тул 80 гэдэг тоонд тийм ч дуртай биш байгаагаа хэлсэн” хэмээн тэрбээр хуваалцав.

Үүнээс гадна Владимир Путин Тэргүүн хатагтай Мелания Трампад сайн сайхныг хүсэж, Орос, Украины хүүхдүүдийг гэр бүлтэй нь эргэн нэгтгэх ажилд оруулж буй түүний хувь нэмрийг өндрөөр үнэлжээ. Хариуд нь Дональд Трамп гэргийгээсээ мэндчилгээ дамжуулж, Оросын талаас түүнд үзүүлж буй дэмжлэгт талархаж байгаагаа илэрхийлсэн байна.

“Баярын албан ёсны хэсгийг бүрэн дуусгахын тулд нэг зүйлийг нэмж хэлэхэд, Владимир Путин Оросын өдөрт зориулж Дональд Трампын ирүүлсэн, Оросын ард түмнийг хүндэтгэсэн дулаан сэтгэлийн мэндчилгээнд талархал илэрхийлсэн” гэж Ушаков яриагаа өндөрлөв.

Эх сурвалж: Кремлийн албан ёсны цахим хуудас