ОХУ-ын Чита хотноо зохион байгуулагдсан Забайкалын олон улсын 13 дугаар кино наадамд Монголын кино урлагийн төлөөлөл амжилттай оролцоод ирлээ. Тус наадамд найруулагч Б.Батдэлгэр домогт “Татар” хамтлагийн түүхийг өгүүлэх “Татар” (18+) уран сайхны киногоороо олон улсын болон Оросын үзэгчдийг байлдан дагуулсан байна.
Өдгөө зургаан бүрэн хэмжээний киноны ард гарсан түүний хувьд Чита хотод анх удаа зочилж буй нь энэ бөгөөд наадмын зохион байгуулалт болон үзэгчдийн халуун уур амьсгалд сэтгэгдэл маш өндөр байгаагаа хуваалцсан юм. Саяхан Москвад болсон шалгаруулалтад тус бүтээл нь 2500 гаруй киноноос шилдэг 12-т багтаж байжээ.
Кино наадмын үеэр хоёр орны харилцааны талаарх асуултад тэрбээр:
“Би Орос, Монголын ард түмнийг ах дүүгийн барилдлагатай гэж үздэг. Орос улсыг өөрийн төрсөн ах шигээ л санадаг даа” хэмээн дулаахан хариулт өгсөн байна.
Түүний уран бүтээлийн түүх ч үүнтэй гүн холбоотой. Өмнө нь Халхын голын дайны сэдэвтэй бүтээл туурвиж байсан найруулагч Б.Батдэлгэр одоо Оросын талтай хамтарсан, Дэлхийн хоёрдугаар дайны тухай шинэ төсөл дээр ажиллаж байгаа аж. Ирэх зургадугаар сараас Чита хотыг оролцуулан жүжигчдийн шалгаруулалтаа эхлүүлэхээр төлөвлөжээ.
Түүхэн сэдэвт бүтээлийн тухайд тэрбээр байр сууриа маш тодорхой илэрхийлсэн юм:
“Бидэнд түүхийг өөрчлөх эрх байхгүй. Бидний гол үүрэг бол үйл явдлыг яг байсан үнэнээр нь уран бүтээлдээ тусгаж, түүхийн үнэнийг үзэгчдэдээ хүргэх явдал юм.”
Шагнал биш, үзэгч чухал
Зөвлөлтийн алдарт “Цөлийн цагаан нар” кинонд дуртайгаа нуугаагүй монгол найруулагч цаашид Оросын продюсеруудтай хамтран ажиллах хүсэлтэй байгаагаа хэлэв. Түүний хувьд наадмын гол үнэ цэн нь алтан цом биш, харин киног нь аль болох олон хүн үзэж, сэтгэлийн тэмтрүүлээ хуваалцах явдал гэдгийг онцолж байлаа.
Энэ жилийн Забайкалын кино наадам нь гэр бүлийн үнэт зүйлс, хүний чанарыг харуулсан бүтээлүүдийг голчлон сонгосон бөгөөд АНУ, Япон, Франц, Сингапур, Хятад зэрэг дэлхийн олон орны уран бүтээлчид цугласан өргөн цар хүрээтэй арга хэмжээ болж өндөрлөв.
.png)
