Монгол, Оросын олон жилийн найрсаг, сайн хөршийн харилцаа, хамтын ажиллагааг залуучуудын оролцоотойгоор өргөжүүлэх зорилготой “Монгол-Оросын залуучуудын форум-2026” Сэлэнгэ аймагт болж байна.

Монгол, Орос хоёр улс түүх, газарзүйн хувьд ойр дотно төдийгүй боловсрол, соёл, шинжлэх ухаан, худалдаа, хөдөө аж ахуй, хил орчмын хамтын ажиллагааны олон жилийн уламжлалтай. Тэрхүү харилцааг залуу үеийнхэнд өвлүүлэн үлдээж, шинэ цагийн хэрэгцээ, боломжид нийцүүлэн хөгжүүлэх нь тус форумын гол ач холбогдол юм.

ОХУ-тай хил залгаа Сэлэнгэ аймаг нь хоёр орны харилцаа, ялангуяа хил орчмын хамтын ажиллагааны чухал бүс нутаг юм. Аймгийн хувьд Бүгд Найрамдах Буриад Улс болон ОХУ-ын хөрш зэргэлдээ бүс нутгуудтай боловсрол, эрүүл мэнд, соёл урлаг, хөдөө аж ахуй зэрэг олон салбарт хамтран ажиллаж ирсэн туршлагатай.

Форумын үеэр Монгол, Оросын залуучуудын боловсрол, хэл соёл, мэргэжил, хөдөлмөр эрхлэлт, бизнес, аялал жуулчлал, инновац, сайн дурын үйл ажиллагаа болон хил орчмын хамтын ажиллагаанд залуучуудын оролцоог нэмэгдүүлэх асуудлыг хэлэлцэж байна. Мөн хоёр орны залуучууд өөрсдийн орон нутагт хэрэгжүүлж буй төсөл, санаачилга, туршлагаа хуваалцаж, цаашид хамтран хэрэгжүүлэх боломжийн талаар санал солилцож байгаа юм.

Ялангуяа залуучуудын боловсрол, мэргэжлийн ур чадварыг хөгжүүлэх хүрээнд их, дээд сургууль, мэргэжлийн боловсролын байгууллагуудын хамтын ажиллагааг өргөжүүлэх, оюутан залуусын солилцоог нэмэгдүүлэх, орос хэл болон монгол хэлний сургалтын орчныг дэмжих асуудал чухал байр суурь эзэлж байна. Ингэснээр залуучууд хоёр орны түүх, соёл, уламжлалыг илүү сайн танин мэдэж, харилцан ойлголцлыг бэхжүүлэх боломж бүрдэх юм.

Мөн залуучуудын бизнес эрхлэлт, шинэ санаачилгыг дэмжих, бүс нутгийн онцлогт түшиглэсэн хамтарсан төсөл хэрэгжүүлэх, аялал жуулчлал, хөдөө аж ахуй, худалдаа, тээвэр, логистикийн салбарт залуучуудын оролцоог нэмэгдүүлэх чиглэлээр санал санаачилга гаргаж байна. Сэлэнгэ аймгийн газарзүйн байршил, хөдөө аж ахуйн үйлдвэрлэл болон ОХУ-тай хиллэдэг давуу тал нь ийм хамтын ажиллагааг хөгжүүлэхэд чухал боломж бүрдүүлдэг.

Форумын үр дүнд хоёр орны залуучуудын байгууллага, орон нутгийн залуучуудын хооронд тогтмол харилцаа холбоо тогтоох, хамтарсан төсөл, хөтөлбөр хэрэгжүүлэх, туршлага солилцох уулзалт, соёлын арга хэмжээ, оюутан залуусын солилцоог тогтмолжуулах чиглэлд хамтын ажиллагааг үргэлжлүүлэхээр зорьж байна.

Монгол, Оросын найрамдал, сайн хөршийн харилцаа үе үеийн түүхэн холбоонд тулгуурладаг. Харин энэ харилцааг ирээдүйд улам бат бөх үргэлжлүүлэх шинэ үе нь залуучууд юм. Тиймээс “Монгол-Оросын залуучуудын форум-2026” нь зөвхөн хоёр орны залуусын уулзалт бус, харилцан ойлголцол, нөхөрлөл, итгэлцлийг шинэ үеийнхний оролцоотойгоор бэхжүүлэх чухал талбар болж байна.

Сэлэнгэ аймагт болж буй энэхүү форум нь хоёр орны залуучуудыг нэг дор уулзуулж, үзэл бодол, туршлага, шинэ санаагаа хуваалцахын зэрэгцээ Монгол, Оросын найрамдалт харилцааг ирээдүйд залуучуудын оролцоотойгоор хэрхэн өргөжүүлэн хөгжүүлэх талаар ярилцаж байгаагаараа онцлог юм.

Эх сурвалж: МОНЦАМЭ