Шанхайн хамтын ажиллагааны байгууллагын (ШХАБ)  яриа хэлэлцээний түнш статусыг Бүгд Найрамдах Ардчилсан Лаос Ард Улсад олгох тухай санамж бичигт гарын үсэг зурах ёслол өнөөдөр боллоо.

Уг баримт бичигт ШХАБ-ын Ерөнхий нарийн бичгийн дарга Нурлан Ермекбаев, Лаосын Шадар сайд бөгөөд Гадаад хэргийн сайд Тхонгсаван Пхомвихан нар Бээжин дэх тус байгууллагын Нарийн бичгийн дарга нарын газарт гарын үсэг зуржээ.

Лаост яриа хэлэлцээний түншийн статус олгох шийдвэрийг 2025 оны есдүгээр сард БНХАУ-ын Тяньжин хотод болсон ШХАБ-ын дээд хэмжээний уулзалтаар гаргасан юм. Харин санамж бичигт гарын үсэг зурснаар уг статусыг олгох бүх үйл явц дуусаж, албан ёсоор хэрэгжиж эхэлж байна. Санамж бичигт яриа хэлэлцээний түншийн үндсэн эрх, үүрэг болон цаашдын хамтын ажиллагааны чиглэлийг тусгажээ.

Яриа хэлэлцээний түнш орнууд ШХАБ-ын дүрмийн дагуу санамж бичигт тусгасан чиглэлүүдийн хүрээнд салбар хуралдаан, сайд нарын түвшний уулзалт, шинжээчдийн форумд оролцох эрхтэй.

Беларусь, Энэтхэг, Иран, Казахстан, Киргиз, Хятад, Пакистан, Орос, Тажикистан, Узбекистан улсуудыг эгнээндээ нэгтгэдэг ШХАБ нь 2001 онд байгуулагдсан олон улсын байгууллага юм. Тус байгууллагын яриа хэлэлцээний түнш орнуудын тоонд Азербайжан, Армени, Афганистан, Бахрейн, Египет, Камбож, Катар, Кувейт, Мальдив, Монгол, Мьянмар, Балба, Арабын Нэгдсэн Эмирт Улс, Саудын Араб, Турк, Шри-Ланка болон Лаос багтаж байна.