2026 оны эхний таван сарын байдлаар Монгол Улсад нийт 292,063 гадаадын жуулчин хүрэлцэн ирсэн нь өмнөх оны мөн үетэй харьцуулахад 32 хувиар буюу 71,935 аялагчаар өссөн үзүүлэлттэй байна. Энэ тухай тус улсын Соёл, спорт, аялал жуулчлал, залуучуудын яамнаас мэдээллээ.

Жуулчдын тоогоор Оросын Холбооны Улс тэргүүлж байгаа бөгөөд тайлант хугацаанд тус улсаас 117,498 аялагч Монголд иржээ. Удаах байруудад дараах улсууд орсон байна. Үүнд:

• БНХАУ: 87,714 жуулчин

• БНСУ: 27,837 жуулчин

• Япон: 9,631 жуулчин

• ХБНГУ: 6,817 жуулчин

Тус яамны мэдээлснээр, зөвхөн 2026 оны тавдугаар сард л гэхэд Монголд 84,035 гадаадын жуулчин ирсэн нь 2025 оны тавдугаар сарын үзүүлэлтээс 26 хувиар (17,675 аялагчаар) өссөн үзүүлэлт юм.

Монгол Улсын Засгийн газар уул уурхайн бүтээгдэхүүний экспортоос хэт хамааралтай эдийн засгаа солонгоруулах, төрөлжүүлэх гол хөдөлгөгч хүчээр аялал жуулчлалын салбарыг тодорхойлон, онцгойлон анхаарч байгаа билээ.

Гэсэн хэдий ч тус улсын аялал жуулчлалын салбар нь эх газрын эрс тэс уур амьсгалтай, өвөл нь урт бөгөөд хүйтэн, зун нь богино болдог уламжлалт хүндрэл бэрхшээлүүдтэй олон жилийн турш тулгарсаар ирсэн юм.

Эдгээр сорилтыг шийдвэрлэхийн тулд Засгийн газраас “Дөрвөн улирлын аялал жуулчлал”-ыг хөгжүүлэх бодлогыг идэвхтэй урагшлуулж байна. Энэхүү ажлын хүрээнд жил бүр хамгийн багадаа 1 сая гадаадын жуулчин хүлээн авах зорилт бүхий “Монголд зочлох жилүүд” үндэсний аяныг 2028 он хүртэл сунгаад байгаа юм.

Ташрамд дурдахад, өнгөрөгч 2025 онд Монгол Улс нийт 846,103 гадаадын жуулчин хүлээн авсан нь өмнөх оныхтой нь харьцуулахад 5 хувиар өссөн үзүүлэлт байжээ.

Эх сурвалж: Монгол Улсын Соёл, спорт, аялал жуулчлал, залуучуудын яам