Монгол Улсын Их Хурлын Эдийн засгийн байнгын хорооны дарга Ринчинбямбын Сэддорж олон улсын «Алтаргана» наадмын талаар сэтгэгдлээ хуваалцлаа.

Эрхэм зочин Буриад улсын ард түмэнд халуун дотноор хүлээн авсанд талархал илэрхийлээд, «Алтаргана» наадам нь найрамдалт бүх ард түмнүүдийн соёлын мөнхийн хэлхээ холбоог хадгалж үлдэх хамгийн хүчтэй хэрэгсэл болохыг онцлов.

«Энэхүү олон улсын наадам нь зөвхөн соёл урлаг, спортын баяр төдийгүй буриад, монгол түмэн болон бүхий л найрамдалт орнуудын оюун санааны бат бөх үнэт зүйлсийг хамгаалж үлдэх хамгийн бодитой арга зам гэдгээрээ онцгой ач холбогдолтой юм» хэмээн тэрбээр хэллээ.

Р.Сэддоржийн үзэж буйгаар, уг наадмын талбарт үндэсний соёл, төрөлх хэл, зан заншил, уламжлал бүрэн шингэж үлддэг бөгөөд энэхүү соёл, түүхийн өвсийг үеэс үед өвлүүлэн үлдээх нь хамгийн гол зорилго ажээ.

«Эдгээр язгуур үндсийг хамгаалж үлдэх нь асар их хариуцлага бөгөөд нөгөөтэйгүүр манай үе үеийнхний хэлхээ холбоог мөнхөд бататгах цуцашгүй хүч юм» гэж тэрбээр нэмж дурдсан байна.

Ташрамд дурдахад, Буриадын нийслэл хотын төв талбайд болсон наадмын нээлтийн ёслолд Монгол Улсаас 1000 гаруй төлөөлөгч оролцсоны 200 орчим нь Дорнод аймгийнх юм. Өнөөдрийн байдлаар Монгол Улсад 40 гаруй мянган буриад зон амьдардаг бөгөөд тэд Хэнтий, Дорнод, Төв, Сэлэнгэ, Дархан-Уул, Булган, Хөвсгөл, Өмнөговь зэрэг аймгуудад суурьшсан байдаг.

Эх сурвалж: “Восточное время” цахим хуудас