Аюулгүй байдлын үл хуваагдах зарчмыг баримталсан тохиолдолд ОХУ НАТО-той яриа хэлэлцээ хийхэд бэлэн байна гэж тус улсын Г외д хэргийн яамны Европын асуудал эрхэлсэн газрын дарга Владислав Масленников “РИА Новости” агентлагт өгсөн ярилцлагадаа дурджээ.

Тэрээр хэлэхдээ, “ОХУ НАТО-гийн холбоотнууд руу халдан довтлох бодолгүй байгааг бид өмнө нь олон удаа мэдэгдсэн. Бидний ашиг сонирхол болон олон улсын аюулгүй байдлыг хангах үндсэн зарчмууд, тэр дундаа хамгийн чухал болох аюулгүй байдлын үл хуваагдах зарчмыг харгалзан үзэж, үүн дээр үндэслэн яриа хэлэлцээ өрнүүлэх нөхцөлд бид нээлттэй байна” хэмээн онцолсон байна.

Дипломатчийн хэлснээр, өрнөдийн тус цэргийн эвсэл нь сөргөлдөөн болон өөрсдийн ашиг сонирхлыг хүчээр тулгах руу чиглэсэн байдаг аж. Түүнчлэн Масленников НАТО-гийн блокийг аюулгүй байдал, тогтвортой байдлыг бэхжүүлэхийн төлөө хамтран ажиллахад бэлэн байгаа эсэхэд эргэлзэж буйгаа илэрхийлэв.

“Үнэн хэрэгтээ НАТО гадаад дайсангүйгээр оршин тогтнох боломжгүй, тиймээс ч байнга шинэ дайсны эрэлд хайгуул хийж байдаг” гэж тэрээр дүгнэжээ.

Өмнө нь ОХУ-ын Ерөнхийлөгч Владимир Путин Оросыг НАТО руу довтолж болзошгүй гэх мэдэгдлүүдийг зүгээр нэг солиорол биш, харин зориуд зохион байгуулсан өдөөн хатгалга хэмээн нэрлэж байсан юм. Тэрээр Барууныхан өөрсдийн радикал цэрэгжилтийг зөвтгөхийн тулд Оросын цэргийн аюул заналхийлэл гэх худал хуурмаг мэдэгдлийг ашиглаж байгааг онцлон тэмдэглэж байжээ.

Эх сурвалж: РИА Новости