Энэ долоо хоногт Улаанбаатар хотноо Монгол-Оросын Архивын салбарын хамтын ажиллагааны хамтарсан комиссын XXVIII хуралдаан боллоо. Энэ тухай “Монцамэ” агентлаг мэдээлэв.

Тус хуралдаанд хоёр улсын архивын байгууллага, яамд, шинжлэх ухааны хүрээлэн болон судалгааны төвүүдийн 100 гаруй төлөөлөгч оролцсон байна. Хуралд Монголын талын төлөөлөгчдийг Архивын ерөнхий газрын дарга Л.Нямгэрэл, Оросын талын төлөөлөгчдийг Холбооны архивын агентлагийн орлогч дарга, Төрийн нарийн бичгийн дарга А.В.Юрасов нар ахлав.

1992 оноос хойш тасралтгүй ажиллаж буй тус хамтарсан комисс нь түүх, соёлын өвийг хамгаалах чиглэлээр Монгол, Оросын хамтын ажиллагааг хөгжүүлэхэд чухал үүрэг гүйцэтгэж ирсэн юм. Өнгөрсөн хугацаанд архивын баримт бичгийг судлах, мэргэжилтэн бэлтгэх, туршлага солилцох, эрдэм шинжилгээний судалгааг хөгжүүлэх чиглэлээр идэвхтэй хамтран ажиллажээ.

Энэ удаагийн хуралдаанаар ОХУ-ын архивуудад хадгалагдаж буй Монголын түүхэнд холбогдох, түүхэн ач холбогдолтой баримт бичгүүдийг эрж хайх, судлах асуудалд онцгой анхаарал хандуулав.

Мөн талууд судлаачдыг харилцан солилцох, шинжлэх ухааны хамтын ажиллагааг өргөжүүлэх, Монгол Улсын Үндэсний төв архивын сан хөмрөгийг баяжуулах зорилгоор архивын материалын хуулбарыг хүлээлгэн өгөх асуудлыг хэлэлцлээ.

Эх сурвалж: “Монцамэ” агентлаг