Цицикарын анагаах ухааны их сургуулийн төлөөлөгчид Чита хотын Улсын анагаах ухааны академид (ЧГМА) найрамдалт айлчлал хийлээ. Айлчлалын хүрээнд төлөөлөгчид тус академийн дэргэдэх Клиникийн үйл ажиллагаатай танилцсан байна. Тус клиникт зөвхөн Забайкалийн хязгаар гэлтгүй Оросын бусад бүс нутгаас жилд дунджаар 150 мянга орчим өвчтөн ирж, шүдний тусламж үйлчилгээ авдаг бөгөөд энэ талаар ЧГМА-ийн MAX дахь албан ёсны сувгаар мэдээллээ.
Клиникийн ерөнхий эмч Алексей Шаповалов зочдод зориулан эмнэлгийн салбар нэгжүүдээр танилцах аялал зохион байгуулав. Хятадын төлөөлөгчид дараах тасгуудын ажиллагаатай биечлэн танилцлаа. Үүнд:
Шүдний техникийн лаборатори
CAD/CAM төсөл-дизайны өрөө
Орчин үеийн рентген оношилгооны цогцолбор
Эмчилгээний болон мэс заслын өрөөнүүд
Унтуулгатайгаар эмчилгээ хийдэг өдрийн стационар
Цицикарын анагаах ухааны их сургуулийн төлөөлөгчдийн анхаарлыг ирээдүйн шүдний эмч нарыг бэлтгэдэг сургалтын тогтолцоо хамгийн ихээр татсан байна. ЧГМА-д сургалтын үйл ажиллагаа нь практиктай нягт уялдаатай байдаг бөгөөд оюутнууд 3 дугаар курсээсээ эхлэн багш нар болон туршлагатай эмч нарын удирдлага дор бодит эмнэлгийн нөхцөлд ажиллаж, мэргэжлийн ур чадвараа эзэмшдэг аж.
Уулзалтын үр дүнд талууд шүдний эмчилгээний боловсролын чанарыг сайжруулах болон академик хөдөлгөөнт байдал буюу оюутан, багш солилцооны хөтөлбөрийг цаашид өргөжүүлэх хэтийн төлөвөө хэлэлцлээ.
Ташрамд дурдахад: Саяхан Цицикарын анагаах ухааны их сургуулийн оюутнууд олон улсын солилцооны хөтөлбөрийн хүрээнд Чита хотод бараг хоёр сарын хугацаанд нарийн мэргэжлийн хичээлүүдийг судалж, практик туршлага хуримтлуулаад буцсан юм.
Эх сурвалж: Чита хотын Улсын анагаах ухааны академийн (ЧГМА) MAX дахь албан ёсны суваг
.png)
